طريقة تحضير بريوش محشي بكريمة اللوز او الشكلاط
بالنسبة للمقادير غنحتاجو نص كيلو دقيق فورص من النوع الجيد
2بيضات
معلقة كبيرة خميرة فورية
70غ سكر
100غ زبدة لينة
200مللتر حليب دافي وقبيصة ملح
كنديرو دقيق فالعجانة ونزيد سنيدة ولملح ولمعلقة دالخميرة كنخلطو المواد الجافة من بعد نزيدو البيض والحليب الدافي تدريجيا حتى يتجمع العجين ويشرب الدقيق كلو عاد كنبداو نزيد زبدة مربعات صغار بالتدريج على العجين حتى كتندمج معالعجين مزيان ونحصلو على عجين مرخوف ومدلوك مزيان وكيتلصق كنغطيه ونخليه ايخمر مزيان حتى يتضاعف الحجم ديالو من بعد كندلكو ونخرج منو لهوا ونقسمو ل16 كويرة
كنكونو وجدنا الكريم داللوز واللي فيها 60غ لوز مطحون بقشورو 80غ زبدة تكون مرخوفة و50غ سنيدة كنخلطهم فلميكسور حتى نحصلو على كريم
كنكرص كل كويرة مزيان وكندير مقدار معلقة من الكريم فلوسط ونشد الجوانب ونعاود نكورها ونحطها فالطاوة ونخليهم ايخمرو شي وحدين عمرتهم غي بالشكلاط لبنتي
ملي كيخمرو كندهنهم بصفار بيضة ومعلقة حليب واللي معمرين بلاكريم داللوز رشيت عليهم اللوز ايفيلي ولاخرين اللي بالشكلاط رشيت فوقهم سكر حبيباتو غلاظ كيكون خاص بالتزيين وندخلهم ايطيبو .
بالصحة والراحة
ليست هناك تعليقات:
إرسال تعليق